اعتراض: صاحب نے مسلمانوں کو جنگل کے سؤر اور ان کی عورتوں کو کتیوں سے بڑھ کرکہا ہے

جہاں تک اس شعر کی تشریح کا تعلق ہے وہ ہمیں کتاب ’’ نجم الہدیٰ‘‘ میں کھلے کھلے لفظوں میں جابجا ملتی ہے اور ثابت کرتی ہے کہ شعر زیر بحث میں مذکور اعداء مسلمانوں میں سے نہیں تھے بلکہ عیسائیوں میں سے تھے۔ اور ان کی دشمنی کا ہدف آنحضرت ﷺ،اسلام اور مسلمان تھے۔ چنانچہ حضرت مسیح موعود علیہ السلام فرماتے ہیں۔

وکُلُّ اَحَدٍ مِنَ القَسُوسِ طَعَنَ فِی دِینِنَا ومَا اِلَّا وَسَبَّ نَبِیَّنَا وشَتَمَ وَقَذَفَ وقَلَا وَتَجِدُونَھُم فی عَقِیدَتِھِمْ مُتَصَلِّبِینَ ومِنَ التَّعَصُّبِ مُتَلَھِّبِینَ وعَلی جُھلَاِتھم مُتَفَقِّیْن وقَدْ صَنَّفُوا فِی اَقْرَبِ مُدَّۃٍ کُتُبًا زھَاءَ مِاَۃَ اَلفٍ نُسْخَۃً وَمَا تَجِدُونَ فِیھَا اِلَّا تَوھِیْنَ الْاِسلاَمِ وبُھْتَانًا وتُھْمۃً ومُلِئَتْ کُلُّھَا مِن عُذْرَۃٍ لانَستَطِیعُ اَنْ نَنْظُرَ اِلَیھَا نَظْرَۃً

ترجمہ:۔ اور پادریوں نے ہمارے دین کی نسبت کوئی دقیقہ طعن کا اٹھا نہیں رکھا ۔ اور ہمارے نبی ﷺ کو گالیاں دیں اور بہتان لگائے اور دشمنی کی اور تم دیکھتے ہو کہ وہ اپنے عقیدے میں کیسے سخت ہو گئے ہیں اور کیسے تعصب سے افر وختہ ہیں اور اپنی باطل باتوں پر کیسے اتفاق کئے بیٹھے ہیں۔ اور تھوڑی مدّت سے ایک لاکھ کتاب انہوں نے ایسی تالیف کی ہے جس میں ہمارے دین اور رسول اللہ ﷺ کی نسبت بجز گالیوں اور بہتان اور تہمت کے اور کچھ نہیں اور ایسی پلیدی سے وہ تمام کتابیں پُر ہیں کہ ہم ایک نظر بھی ان کو دیکھ نہیں سکتے۔

(نجم الہدیٰ ۔ روحانی خزائن جلد 14 صفحہ 64)

پھر فرمایا :۔

ترجمہ :۔’’پس ہر ایک شخص جو ان کے دین میں داخل ہوتا ہے اس کے لئے وظیفہ مقرر کیا جاتا ہے اور اس کا تفرقہ اور پراگندگی دور کی جاتی ہے اور پادریوں کے مال نے ان کی بات کو قوی کر دیا ہے اور ان کی حیلہ سازی اس سے بڑھ گئی ہے۔ شکار کرنے اور قید کرنے کے تمام ہتھیار ان کو مل گئے ہیں۔اور چھوٹی بڑی فلاخنیں تمام استعمال میں لا رہے ہیں۔ اور ہر ایک شہر کی طرف ایک جماعت نو عیسائیوں کی بھیجی گئی ہے اور انہوں نے ہر ایک شہر میں اپنے گرجے بنائے اور مقیموں کی طرح وہاں رہنے لگے۔ اور سیلاب کی طرح مسلمانوں کے کوچوں میں بہنے لگے اور طرح طرح کے افتراؤں سے اس شہر کے باشندوں کو دھوکے دینے لگے۔ پھر اپنی عورتیں اسی غرض کے لئے شریفوں کے گھروں میں بھیجیں۔ پس حاصل کلام یہ کہ انہوں نے ہر ایک طور سے مکر کا بیج بویا۔ اور ٹڈی کی طرح ان اطراف میں منتشر ہو گئے۔ اور ہر ایک کو جو ہدایت کے نشانوں کو زندہ کرتا تھا دشمن پکڑا اور ہمارے ملک کو بلا اور موت کی جگہ بنا دیا اور ان کے مذہب باطل نے ہمارے ملک کی نیکیوں کو دور کر دیا اور کوئی گھر ایسا نہ رہا جس میں یہ مذہب باطل داخل نہ ہوا اور اس ملک کے باشندے جو اکثر عوام میں ہیں مقابلہ کی تاب نہ لا سکے اور نہ گریز کے لئے کوئی حیلہ ملا پس اسلام پر وہ مصیبتیں پڑیں جن کی نظیر پہلے زمانوں میں نہیں ہے ۔ پس وہ اس شہر کی طرح ہو گیا جو مسمار ہو جائے اور اس جنگل کی طرح جو وحشیوں سے بھر جائے۔

(نجم الہدیٰ ۔ روحانی خزائن جلد 14صفحہ 66 ، 67)

پھر فرمایا :۔

ترجمہ :۔’’پس خدا تعالیٰ نے ایک انسان کو مسیح کے نام پر ملّتِ اسلامیہ میں بھیجا تا اس امّت کی بزرگی ظاہر ہو۔ اور یہ بھیجنا اس وقت ہوا کہ جب فساد کمال کو پہنچ گیا اور لوگ کثرت سے مرتد ہونے لگے اور ذیاب نے تباہی ڈالی اور کلاب نے آوازیں بلند کیں اور بہت سی کتابیں گالیوں سے بھری ہوئی تالیف کی گئیں۔ اور جھوٹ کی فوجوں اور ان کے سواروں اور پیادوں نے اسلام پر چڑھائی کی۔ اور زمین پر ایک زلزلہ آیا۔ اور گمراہی کمال کو پہنچ گئی اور ظالموں کی کارروائی لمبی ہو گئی۔ اور خدا تعالیٰ کا وعدہ تھا کہ مسیح موعود کے ساتھ صلیب کو توڑے گا اور اپنے عہدوں کو پورا کرے گا اور خدا تعالیٰ تخلّف وعدہ نہیں کرتا۔

(نجم الہدیٰ ۔ روحانی خزائن جلد 14صفحہ 77 ، 78)

یہ عبارتیں صاف بتا رہی ہیں کہ کتاب ’’ نجم الہدیٰ‘‘ کی نظم ونثر میں حضرت مسیح موعود علیہ السلام نے اپنے محبوب حضرت محمّد مصطفی ﷺ کی ارفع شان اور اسلام کی عظمت کا ذکر فرمایا ہے اور رسول خدا ﷺ کی خاطر اپنی طبعی غیرت اور محبّت بیان فرمائی ہے اسی طرح عیسائیوں کی یلغار اور ان کی کاروائیوں کا ذکر کر کے اس جنگل کی بھی نشاندہی فرمائی ہے ۔جس میں عیسائی پادری پھرنے لگے تھے اور ان کی عورتوں کی ’’کارروائیوں‘‘ کا بھی ذکر فرمایا ہے ۔ الغرض اس نظم کا سارا سباق اس کی تشریح کرتا ہے اور ثابت کرتا ہے کہ اس سے مراد وہ لوگ ہیں جو عیسائی ہیں اور آنحضرت ﷺ کو گالیاں دینے والے ہیں لیکن اس کے باوجودمعترضین کا تکرار کرتے چلے جانا کہ اس شعر سے وہ اور دوسرے مسلمان مراد ہیں سمجھ سے بالا تر ہے۔