اعتراض: مرزا صاحب کا کہنا کہ قرآن و حدیث میں طاعون کی پیشگوئی ہے، خلاف واقعہ ہے

حضرت مسیح موعود علیہ السلام نے خود قرآن کریم کا حوالہ بیان فرمایا ہے جہاں طاعون کا ذکر ہے ۔آپؑ فرماتے ہیں:۔

”خدا تعالیٰ کی کتابوں میں تصریح سے بیان کیا گیا ہے کہ مسیح موعود کے زمانہ میں ضرور طاعون پڑیگی اور اس مری کا انجیل میں بھی ذکر ہے اور قرآن مجید میں بھی اللہ تعالیٰ فرماتا ہے وَاِنْ مِّنْ قَرْیَةٍ اِلَّا نَحْنُ مُھْلِکُوْھَاقَبْلَ یَوْمِ الْقِیَامَةِ اَوْ مُعَذِّبُوْھَا(بنی اسرائیل59)یعنی کوئی بستی ایسی نہیں ہوگی جس کو ہم کچھ مدت پہلے قیامت سے یعنی آخری زمانہ میں جو مسیح موعود کا زمانہ ہے ہلاک نہ کردیں یا عذاب میں مبتلاء نہ کریں۔“

(نزول المسیح ۔روحانی خزائن جلد 18صفحہ396)

پھر آپؑ ایک دوسری آیت کا حوالہ دیتے ہوئے فرماتے ہیں:۔

”یہی طاعون ہے او ریہی وہ دابۃ الارض ہے جس کی نسبت قرآن شریف میں وعدہ تھا کہ آخری زمانہ میں ہم اس کو نکالیں گے او وہ لوگوں کو اس لئے کاٹے گا کہ وہ ہمارے نشانوں پر ایمان نہیں لاتے تھے، جیسا کہ اللہ تعالیٰ فرماتا ہے:

            وَاِذَا وَقَعَ الْقَوْلُ عَلَیْھِمْ اَخْرَجْنَا لَھُمْ دَابَّةً مِّنَ الْاَرْضِ تُکَلِّمُھُمْ اَنَّ النَّاسَ کَانُوْا بِاٰیَاتِنَا لَایُوْقِنُوْنَ( النمل:83)اور جب مسیح موعود کے بھیجنے سے حجت ان پر پوری ہوجائیگی تو ہم زمین میں سے ایک جانور نکال کھڑا کریں گے وہ لوگوں کو کاٹے گا اور زخمی کریگا اس لئے کہ وہ لوگ خدا کے نشانوں پر ایمان نہیں لاتے تھے۔‘‘

 (نزول المسیح۔روحانی خزائن جلد 18صفحہ415تا416)