حضرت مرزا طاہر احمد ؒ کا مباہلہ کا چیلنج اور الیاس ستار

’’ہمارے علماء  کو یہ بات سمجھنی چاہیے  کہ میں ساری دنیا کی جماعتوں کا سربراہ ہوں اور میرا کام یہ نہیں ہے کہ ہر للو پنجو کو جو اٹھ کر مباہلہ کا چیلنج کرے اس کا مباہلہ قبول ہی کروں یا اسے جوابی چیلنج دوں لیکن پتا نہیں کیوں لوگ سمجھتے نہیں ہیں ؟ اس لئے واقعہ یہ ہوا کہ کراچی کے دو مربی صاحبان  نے بظاہر ایک مخالف کے جال میں پھنس  کر مباحثہ میں  اسکو بلوالیا اور وہ پہلے سے ارادہ لے کر آیا تھا کہ مباحثہ کے دوران اچانک مباہلہ کا چیلنج پیش  کر دوں گا۔ چنانچہ  اس نے مناظرہ کے دوران ایک مباہلے کا چیلنج پیش کر دیا ۔ باوجود اس کے کہ مجھ پر لازم نہیں تھا کیونکہ میں نے تو اس کو کوئی چیلنج نہیں دیا تھا ۔ مجھ پر ہرگز لازم نہیں تھا کہ اس کے چیلنج  کو من و عن قبول کرتا ۔ اگر کرنا بھی تھا تو اس سے شرطیں لگائی جاتیں کہ اپنے پیچھے قوم کے راہنما بتاؤ ۔ کون تمہاری تائید میں ہیں ؟ کون تسلیم کرتا ہے کہ ہاں اگر تم ہار گئے تو پھر ہم احمدیت کی فتح قبول کر لیں گے مگر ان سب باتوں کے قطع نظر ہمارے دو بھولے بھالے  مربیان نے اس کا مباہلے کا چیلنج  نہ صرف قبول کر لیا بلکہ میرا چیلنج اس کو دے دیا ۔ اب اس کا اُس سے کیا تعلق  تھا ان کو کوئی حق نہیں تھا یہ کام کرتے مگر میں سمجھتا ہوں کہ وہ احمدی فوج کے لڑنے والے ہی تھی  اس لئے انہوں نے جو تسلیم کر لیا میں بھی تسلیم کرتا ہوں اور اس پہلو سے میں اس مباہلے کے چیلنج کو قبول کر چکا ہوں ۔ اب میں وہ مباہلہ جس پر دستخط  ہوئے ہیں اس کےبعض ضروری الفاظ آپ کے سامنے سناتا ہوں تاکہ آپ اچھی طرح ذہن نشین  کر لیں کہ مباہلہ  کرنے والا دراصل اسی مباہلہ کے دوران ہی جھوٹا ثابت  ہو چکا ہے ۔ الفاظ جو پیش کئے گئے  وہ یہ ہیں ۔ میں نے بڑے واشگاف الفاظ میں احمدیت کے دعاوی دشمن کے سامنے رکھے تھے جن کے متعلق یہ کہا تھا کہ ایک ایک کے متعلق یہ اعلان کرو کہ یہ جھوٹا دعویٰ ہے ، یہ جھوٹا دعویٰ ہے ، یہ جھوٹا دعویٰ ہے ۔ اس نے کوئی ایسا دعویٰ نہیں کیا اور جو الفاظ ہیں وہ میں آپ کے سامنے رکھتا ہوں ۔

جماعت احمدیہ کے معاندین یہ کہتے ہیں کہ ’’جماعت احمدیہ عقائد رکھتی ہے کہ بانی ٔ جماعت احمدیہ مرزا غلام احمد قادیانی  خدا تھے ۔‘‘لَعْنتُ اللہ ِ عَلَی الْکَاذِبِیْنَ۔(حضور انور نے حاضرین کو فرمایا کہ آپ سب بھی کہیں  لَعْنتُ اللّٰہ ِ عَلَی الْکَاذِبِیْنَ ۔جس پر حاضرین نے لَعْنتُ اللّٰہ ِ عَلَی الْکَاذِبِیْنَ کہا)حضور انور نے فرمایا کہ آج ایک کروڑ داخل ہونے والوں کےعلاوہ جب سے جماعت بنی ہے کروڑہا احمدیوں میں سے ایک بھی ایسا نہیں جو حضرت مرزا غلام احمد قادیانی ؑ کو خدا کہتا ہو یا خدا تسلیم کرتا ہو۔

دوسرا دعویٰ : ’’وہ خدا کا بیٹا تھے ۔‘‘ لَعْنتُ اللّٰہ ِ عَلَی الْکَاذِبِیْنَ  اور پھر  یہ دعویٰ ایک دوسرے کو بھی جھٹلا  رہے ہیں ۔ خدا تھے تو خدا کا بیٹا کیسے ہو گئے ؟ یہ مولویوں کا پاگل پن ہے یعنی پاگل پنوں میں سے ایک پاگل پن ہے ۔

ایک اور دعویٰ :’’خدا کا باپ بھی تھے ‘‘۔اس پہ تو لعنت سے زیادہ انا للہ پڑھنے کو دل چاہتا ہے ۔

پھر یہ خوفناک دعویٰ  کہ ’’تمام انبیاء سے بشمول  حضرت محمد مصطفیٰ ﷺ  افضل و برتر تھے ۔‘‘کوئی احمدی ساری دنیا میں اس دعوے کا وہم و گمان بھی نہیں کر سکتا۔

پھر کہتے ہیں کہ ان کی وحی کے مقابلہ میں حدیث مصطفیٰ ﷺ کی کوئی حیثیت نہیں ۔نعوذ باللّٰہ من ذالک، لَعْنتُ اللّٰہ ِ عَلَی الْکَاذِبِیْنَ ۔

’’ان کی عبادت کی جگہ عزت و احترام میں خانہ کعبہ کے برابر  ہے ۔ ‘‘یعنی ہر احمدی مسجد خانہ کعبہ کے برابر ہے ۔ انا للّٰہ و انا الیہ راجعون  یا لَعْنتُ اللّٰہ ِ عَلَی الْکَاذِبِیْنَ ۔

’’قادیان کی سر زمین مکہ مکرمہ کے ہم مرتبہ ہے ۔‘‘

’’قادیان سال میں ایک دفعہ جانا تمام گناہوں کی بخشش کا موجب بنتا ہے ۔‘‘ہمارا تو دعویٰ  یہ ہے کہ دنیا میں کسی مقدس مقام پر جانا بخشش کا موجب نہیں بنا کرتا ۔ تقویٰ ہے جو بخشش کا موجب بنتا ہے اگر تقویٰ لے کرجاؤ گے تو پھر یقینا ً اللہ تعالیٰ بخش  دے گا اگر تقویٰ  کے بغیر جاؤ گے تو پھر اس کی مرضی ہے چاہے تو بخش دے چاہے تو سزا دے ۔

میں نے ان کو یہ چیلنج دیا  کہ بتاؤ یہ کہاں سے سچ ثابت کیا ہے تم نے  اور حج بیت اللہ کی بجائے قادیان کے جلسہ  میں شمولیت ہی حج ہے ۔ لَعْنتُ اللہ ِ عَلَی الْکَاذِبِیْنَ ۔

ان الزامات  کے علاوہ حسب ذیل نہایت مکروہ الزامات بھی جماعت احمدیہ  پر لگائے جاتے ہیں ۔

’’احمدیوں کا کلمہ الگ ہے اور مسلمانوں والا کلمہ نہیں  ۔‘‘ لَعْنتُ اللّٰہ ِ عَلَی الْکَاذِبِیْنَ ، لا الہ الا اللہ محمد رسول اللہ ۔

’’جب احمدی مسلمانوں والا کلمہ لا الہ الا اللہ  محمد رسول اللہ پڑھتے ہیں تو دھوکہ دینے کی خاطر پڑھتے  ہیں اور محمد ؐ سے مراد مرزا غلام احمد قادیانی  لیتے ہیں ۔ لَعْنتُ اللّٰہ ِ عَلَی الْکَاذِبِیْنَ ۔‘‘

’’احمدیوں کا خدا وہ خدا نہیں جو محمد رسول اللہ ﷺ اور قرآن کریم کا خدا ہے ۔‘‘ لَعْنتُ اللّٰہ ِ عَلَی الْکَاذِبِیْنَ ، ایک ہی خدا ہے سب کا وہی خدا ہے ۔

’’قادیانی جن ملائکہ پر ایمان لاتے ہیں وہ وہ ملائک نہیں جن کا قرآن اور سنت میں ذکر ہے ۔‘‘ لَعْنتُ اللّٰہ ِ عَلَی الْکَاذِبِیْنَ ۔

’’قادیانیوں کے رسول بھی مختلف ، ان کی عبادت بھی اسلام سے مختلف ، ان کا حج بھی مختلف غرضیکہ تمام بنیادی اسلامی عقائد میں قادیانیوں کے عقائد  قرآن و سنت سے جدا اور الگ ہیں ۔‘‘

ان سارے الزامات  کا ذکر کر کے میں نے یہ اعلان کیا تھا کہ یہ سارے الزامات سراسر جھوٹے ہیں ، کھلم کھلا افتراء ہیں ان میں ایک بھی سچا نہیں  اور لَعْنتُ اللّٰہ ِ عَلَی الْکَاذِبِیْنَ ۔ آخر پر میں خدا کی لعنت ان جھوٹوں پر ڈالتا ہوں۔

میں نے یہ بھی اعلان کیا تھا کہ اگر یہ باتیں جھوٹ ہیں جیسا کہ جھوٹ ہیں تو پھر اے خدا ! جماعت احمدیہ پر رحمتیں نازل فرما۔ لعنتیں ان پر پڑیں اور رحمتیں  جماعت پر اور اس کی سچائی کو ساری دنیا پر روشن کر دے ۔

پس آج ساری دنیا سے آنے والے گواہ ہیں کہ خدا کی قسم جماعت احمدیہ کی سچائی سب دنیا پر روشن ہو چکی ہے ۔ تاکہ دنیا دیکھ لے کہ تو ان کے ساتھ ہے اور ان کی حمایت اور پشت پناہی میں کھڑا ہے اور اگر دشمن کے الزامات سچے ہیں تو ہم پر ہر سال اپنا غضب نازل فرمااور ذلت اور نکبت کی مار دے کر اپنے عذاب اور قہری تجلیوں کا نشانہ بنا اور اس طور سے اپنے عذاب کی چکی میں پیس تاکہ دنیا خوب اچھی طرح دیکھ لے کہ ان آفات میں بندوں کی شرارت اور دشمنی اور بغض کا دخل نہیں بلکہ محض خدا کی غیرت اور قدرت کا ہاتھ ہے۔ یہ سب عجائب کام ہیں جو تو دکھلاتا ہے ۔

اس ضمنی ذکر کے بعد جو مجھ پر ٹھونسا تو گیا مگر میں نے قبول کر لیا تھا ۔ میں اب آپ کے سامنے یہ بات کھول رہا ہوں کہ صرف یہ ایک سال اس مباہلہ کرنے والے کوجھوٹا ثابت  کر دے گا کیونکہ اس سال جماعت کو مٹنا چاہئے تھا بجائے مٹنے  کے یہ اور بھی زندہ  ہو گئی ، زندہ سے زندہ تر ہوتی چلی جا رہی ہے ۔ پس ان سب کی تعلیات الٹی ان پر پڑتی ہیں ۔ ہمیں اس کی کوئی بھی پراہ نہیں آئندہ کے لئے میری نصیحت  یہ ہے کہ اس معاملے  کو خدا پر چھوڑ دیں ۔ آپ دیکھیں گے کہ دن بدن جماعت ترقی پر ترقی  کرتی چلی جائے گی اور ہر سال خواہ کوئی مباہلہ قبول  کرے یا نہ کرے اس کے اوپر ہماری طرف  سے یہ لعنت کا انبار بڑھتا ہی چلا جائے گا ۔ اللہ کرے گا تو ایسا ہی ہو گا اور ہم میں سے جو زندہ رہیں گے وہ سب اس کو دیکھیں گے۔ ‘‘

(خطابات طاہر جلد دوم صفحہ470تا473)