شعر ’’ابنِ مریم کے ذکر کو چھوڑو-اس سے بہتر غلامِ احمد ہے‘‘ پر اعتراض کا جواب

سب سے اول حضرت مسیح موعود علیہ السلام کا ایک حوالہ پیش ہے ۔ آپؑ فرماتے ہیں :۔

’’ ہم اس بات کے لئے بھی خدا تعالیٰ کی طرف سے مامور ہیں کہ حضرت عیسیٰ علیہ السلام کو خدا تعالیٰ کا سچا اور پاک اور راستباز نبی مانیں اور اُن کی نبوت پر ایمان لاویں۔ سو ہماری کسی کتاب میں کوئی ایسا لفظ بھی نہیں ہے جو اُن کی شان بزرگ کے برخلاف ہو۔ اور اگر کوئی ایسا خیال کرے تو وہ دھوکہ کھانے والا اور جھوٹا ہے۔ ‘‘

(ایام الصلح۔ رخ جلد14ص228)

اب جبکہ یہ واضح ہو چکا کہ حضرت مسیح موعود علیہ السلام نے کہیں بھی حضرت عیسیٰ ابن مریم کی توہین نہیں کی توظاہر ہے  معترضہ اشعار میں بھی کوئی توہین کا پہلو نہیں ۔

معترضہ شعر کا سیاق

علاوہ ازیں جب ہم معترضہ شعر سے پہلے اشعار دیکھتے ہیں تو ان میں سراسر نبی کریم ﷺ کی تعریف اور آپﷺ کے اوصاف کا بیان ملتا ہے ۔ ملاحظہ ہو :۔

زندگی بخش جام احمد ہے         کیا پیارا یہ نام احمد ہے

لاکھ ہوں انبیاء مگر بخدا          سب سے بڑھ کر مقام احمدہے

باغ احمد سے ہم نے پھل کھایا  میرا بستاں کلام احمد ہے

اِبن مریم کے ذکر کو چھوڑو                 اُس سے بہتر غلامِ احمد ہے

یہ باتیں شاعرانہ نہیں بلکہ واقعی ہیں اور اگر تجربہ کے رو سے خدا کی تائید مسیح ابن مریم سے  بڑھؔ کر میرے ساتھ نہ ہو تو میں جھوٹا ہوں۔ خدا نے ایسا کیا نہ میرے لئے بلکہ اپنے نبی مظلوم کے لئے۔‘‘

(دافع البلاء۔ رخ جلد 18ص240-241)

ایک اور جگہ آپؑ فرماتے ہیں :۔

’’ سوال:۔ آپ کی طرف سے نبی یا رسول ہونے کے کلمات شائع ہوئے ہیں اور یہ بھی کہ مَیں عیسیٰؑ سے افضل ہوں اور اَور بھی تحقیر کے کلمات بعض اوقات ہوتے ہیں جن پر لوگ اعتراض کرتے ہیں۔

حضرت اقدس:۔ ہماری طرف سے کچھ نہیں ہوتا۔مَیں ان باتوں کا خواہشمند نہیں تھا کہ کوئی میری تعریف کرے اور میں گوشہ نشینی کو ہمیشہ پسند کرتا رہا،لیکن مَیں کیا کروں،جب خداتعالیٰ نے مجھے باہر نکالا۔یہ کلمات میری طرف سے نہیں ہوتے۔۔۔۔

اور یہ بالکل غلط ہے کہ مَیں انبیاء ورسل یا صلحاء اُمّت کی تحقیر کرتا ہوں۔جیسے میں ابرارواخیار کا درجہ سمجھ سکتا ہوں اور اُن کے مقام وقرب کا جتنا علم مجھے ہے کسی دوسرے کو نہیں ہوسکتا کیونکہ ہم سب ایک ہی گروہ سے ہیں اورالجنس مع الجنس کے موافق دوسرے اس درجہ کے سمجھنے سے عاری ہیں۔

حضرت عیسیٰؑ اور امام حسینؓ کے اصل مقام اور درجہ کا جتنا مجھ کا علم ہے دوسرے کو نہیں ہے کیونکہ جوہری ہی جوہر کی حقیقت کو سمجھتا ہے۔اس طرح پر دوسرے لوگ خواہ امام حسینؓ کو سجدہ کریں مگر وہ اُن کے رُتبہ اور مقام سے محض ناواقف ہیں اور عیسائی خواہ حضرت عیسیٰؑ کو خدا کا بیٹا یا خدا جو چاہیں بنا ویں مگر وہ اُن کے اصل اتناع اور حقیقی مقام سے بے خبر ہیں اور ہم ہر گز تحقیر نہیں کرتے۔ ‘‘

(ملفوظات جلد 3ص530)