عبارت "رَأیْتُنِیْ فِی الْمَنَامِ عَیْنَ اللّٰہِ۔۔۔” پر اعتراض

یہ ایک” خواب “ہے اور روٴیا و کشف کو ظاہر پر محمول کرنا صریح نادانی اور ظلم ہے۔ پھر اس کی بنا ء پر اس زمانہ کے موحد اعظم پر الزام شرک لگانا سراسرظلم کیا ہے ۔اگر یہ کہا جائے کہ خواب میں ایسا کام نہیں کیا جاسکتا جو بیداری میں ناجائز ہو توصحیح بخاری نے جو اَصَحُّ الْکُتُبِ بَعْدَ کِتَابِ اللّٰہِ (یعنی اللہ کی کتاب کے بعد سب سے صحیح کتاب) میں لکھاہے کہ سرور کائنات ﷺ نے فرمایا ۔

”رَأَیْتُ فِیْ یَدَیَّ سَوَارَیْنِ مِنْ ذَھَبٍ۔“ (صحیح بخاری کتاب الروٴیا باب النفخ فی المنام جلد نمبر 4 صفحہ نمبر 134 مطبع الٰہیہ مصر وجلد 3 صفحہ نمبر 49)

ترجمہ :میں نے سونے کے دو کنگن اپنے ہاتھوں میں پہنے ہوئے دیکھے۔

حالانکہ آپﷺ خود فرماتے ہیں کہ سونا پہننا مردوں پر حرام ہے ۔ تو کیا معترضین یہ فتویٰ دیں گے کہ نعوذ باللہ حضور نے فعلِ حرام کا ارتکاب کیا؟ ہرگز نہیں ۔ کیونکہ حرمت کا فتوی ظاہر پر ہے اور یہ واقعہ خواب کا ہے ۔ اور کشف کو ظاہر پر محمول کرنا ہر گز درست نہیں ۔

تَعْطِیْرُ الْاَنَامِ فِی تَعْبِیْرِ الْمَنَا مِ موٴلفہ علامہ سید عبدالغنی النا بلسی مطبوعہ مصر میں جو تعبیر خواب کی بہترین کتاب ہے لکھا ہے :۔

”مَنْ رَأی فِی المَنَامِ کَأنَّہ صَارَ الحَقَّ سُبحَا نَہ تَعَالیٰ اِھتَدَی اِلٰی الصِّرَاطِ المُستَقِیمِ۔“ (صفحہ نمبر9)

 ترجمہ: جو شخص خواب میں یہ دیکھے کہ وہ خدا بن گیا ہے تو اس کا مطلب یہ ہے کہ عنقریب خدا تعالیٰ اس کو ہدایت کی منزل ِمقصود تک پہنچائے گا۔ (یہ حوالہ تعطیر الانا م کے نسخہ مطبوعہ مطبع حجازی قاہرہ کے صفحہ 90 پر ہے)

آنحضرت کی ایک روٴیا

اگرحضرت مسیح موعود کے محولہ بالا کشف قابل اعتراض ہے تو پھر اس حدیث کے متعلق کیا خیال ہے جس میں رسول کریم ﷺ فرماتے ہیں ۔

”رَأَیْتُ رَبِّیْ فِیْ صُوْرَةِ شَابٍ امرد قطط لَہ وفرة مِنْ شَعْرٍ وَّ فِیْ رِجْلَیْہُ نَعْلَانِ مِنْ ذَھَبٍ۔ “ (الیواقیت والجواہر جلد اول صفحہ ۷۱ بحوالہ طبرانی نیز موضوعات کبیر صفحہ ۴۶)

ترجمہ: میں نے اپنے رب کو ایک نوجوان کی شکل پر دیکھا اس کے لمبے بال اور اس کے پاؤں میں سونے کے جوتے تھے ۔

اب کیا اس کشف کو ظاہری معنوں میں لیا جائے گا؟

ہاں یاد رہے کہ اس حدیث کے متعلق انکا رممکن نہیں کیونکہ ابن صدقہ فرماتے ہیں ۔

”حَدِیْثُ ابْنِ عَبَّاس صَحِیْحٌ لَا یُنْکِرُہ اِلّا مُعْتَزِلِیْ۔ “ (موضوعات ملا علی قاری صفحہ ۴۶)

یعنی اس حدیث کا سوائے معتزلی کے کوئی انکار نہیں کرتا ہے ۔

صرف ایک ہی جواب ہے اور وہ یہ ہے کہ یہ واقعہ کشفی ہے چنانچہ ملا علی قاری  فرماتے ہیں۔

”اَلْحَدِیْثُ اِنْ حُمِلَ عَلٰی الْمَنَامِ فَلَا اَشْکَالَ فِیْ الْمَنَامِ۔“ (حوالہ مذکور )

کہ اگر اس حدیث کو خواب پر محمول کیا جاوے تو کوئی اعتراض نہیں۔