ثبوت وفات مسیح از سورۃالمآئدہ آیت 76

وَمَا الْمَسِیْحُ ابْنُ مَرْیَمَ اِلَّا رَسُوْلٌ قَدْ خَلَتْ مِنْ قَبْلہِ الرُّسُلُ وَاُمُّہُ صِدِّیْقَۃٌ کَانَا یَاْکُلَانِ الطَّعَامَ (المآئدہ :76)

ترجمہ: اور نہیں مسیح بن مریم مگر رسول۔ گذر چکے پہلے اس سے کئی رسول۔ اس کی ماں ایک پاک اور سچی عورت تھی۔ وہ دونوں ماں بیٹا کھانا کھایا کرتے تھے ۔

حضرت مسیح موعود علیہ السلام فرماتے ہیں:۔

’’یعنی مسیح صرف ایک رسول ہے اس سے پہلے نبی فوت ہوچکے ہیں اور ماں اس کی صدیقہ ہے جب وہ دونوں زندہ تھے تو طعام کھایا کرتے تھے۔ یہ آیت بھی صریح نص حضرت مسیح کی موت پر ہے کیونکہ اس آیت میں بتصریح بیان کیا گیاہے کہ اب حضرت عیسیٰ اور اُن کی والدہ مریم طعام نہیں کھاتے ہاں کسی زمانہ میں کھایا کرتے تھے جیسا کہ کَانَا کالفظ اس پر دلالت کررہاہے جو حال کو چھوڑکر گذشتہ زمانہ کی خبر دیتا ہے۔ اب ہر یک شخص سمجھ سکتا ہے کہ حضرت مریم طعام کھانے سے اسی وجہ سے روکی گئی کہ وہ فوت ہوگئی اور چونکہ کَانَا کے لفظ میں جو تثنیہ کا صیغہ ہے حضرت عیسیٰ بھی حضرت مریمؔ کے ساتھ شامل ہیں اور دونوں ایک ہی حکم کے نیچے داخل ہیں لہٰذا حضرت مریم کی موت کے ساتھ اُن کی موت بھی ماننی پڑی کیونکہ آیت موصوفہ بالا میں ہرگز یہ بیان نہیں کیا گیا کہ حضرت مریم تو بوجہ موت طعام کھانے سے روکے گئے لیکن حضرت ابن مریم کسی اَور وجہ سے۔ اور جب ہم اس آیت مذکورہ بالا کو اس دوسری آیت کے ساتھ ملا کر پڑھیں کہ وَمَا جَعَلْنَا ھُمْ جَسَدًا لَّایَاْکُلُوْنَ الطَّعَامَ (الانبیاء:9) جس کے یہ معنے ہیں کہ کوئی ہم نے ایساجسم نہیں بنایا کہ زندہ تو ہو مگر کھانا نہ کھاتا ہو۔ تو اس یقینی اور قطعی نتیجہ تک ہم پہنچ جائیں گے کہ فی الواقعہ حضرت مسیح فوت ہوگئے کیونکہ پہلی آیت سے ثابت ہوگیا کہ اب وہ کھانا نہیں کھاتے اور دوسری آیت بتلا رہی ہے کہ جب تک یہ جسم خاکی زندہ ہے طعام کھانا اس کے لئے ضروری ہے۔ اس سے قطعی طورپر یہی نتیجہ نکلتا ہے کہ اب وہ زندہ نہیں ہیں۔‘‘

(ازالہ اوہام۔ روحانی خزائن جلد 3صفحہ 425تا426)

اِستدلال از حضرت خلیفۃ المسیح الرابع رحمہ اللہ تعالیٰ

اس آیت سے ثابت ہے کہ مسیح ؑ اور ان کی والدہ کھانے کے محتاج تھے ۔ اور ان کا مادی جسم بغیر کھانے کے برقرار نہ رہ سکتا تھا۔ اور اللہ تعالیٰ کا بطور ماضی استمراری یہ بیان کرنا کہ وہ کھانا کھایا کرتے تھے۔ صاف دلالت کرتا ہے کہ اب وہ کھانے کے محتاج نہیں ۔ لہٰذا ثابت ہوا کہ اب وہ دونوں وفات پا چکے ہیں۔